Aretxabaletako kultura zinegotzi Ainhoa Caberok, kultura teknikari Imma Miguelek, Bergara Idazle Eskolako zuzendari Tere Irastortzak, eta epaimahai kide Pako Aristik egin dute aurkezpena.
"Esan behar da Karmele Igartua beka honek baduela berezitasun bat, eta da ez dela urtero genero berdina izaten; aldatuz joaten da urtez urte, eta horrek ematen dio beste berezitasun bat. Aurten konbokatzen den beka hau poesiari eskainia dago", azaldu du Aristik.
Idazle berriak bultzatzeko lehiaketa da Karmele Igartua. "Idatzi zituen gidoiak, haurrentzako antzerki asko eskolan munduan, baina bera poeta bezala egin da ezagun, eta ez bakarrik herri mailan baizik eta Euskal Herri mailan, eta bere azken liburua ere Espainiako Poesia Sari Nazionaleko finalista euskalduna izan zen", gaineratu du Bergarako Idazle Eskolako zuzendariak.
Lanak aurkezteko epea zabalik da azaroaren 30era arte. Lehiaketako oinarriak ikusgai egongo dira Idazten.com atarian.
Igartuaren poesia osoa liburu batean
Lehiaketako antolatzaileek jakinarazi dute, gainera, laster egongo dela prest Karmele Igartuaren poesia obra guztia jasotzen duen argitalpena. Pamielak kaleratuko du Aretxabaletako Udalaren eta Idazle Eskolaren laguntzarekin. Durangoko Azokarako prest gura dute liburua. "Bere azken bi poema liburuak Pamiela argitaletxeak argitaratuak izan ziren, baina aurreko poema liburua, batzuetan ohi denez, zailagoa da topatzen. Guretzat poz handia da Karmele Igartuaren obra osoa batera biltzea, eta horretarako ezinbestekoa izan da Aretxabaletako Udalaren konpromisoa", esan du Irastortzak.
