Martin Kabarrixa pertsonaiari ongietorria eginda eta tantaia jasota hasiko dituzte gaur iluntzean Agorreko Andramaixak Areantzan, eta domeka eguerdira bitartean jai giroa izango da auzoan. Bihar, kanpai-joaldiak (20:00) izango dira kanpai eskolakoen eskutik, eta ondoren (20:30), afaltzeko elkartuko dira auzotarrak.
Zapatuan, txistulariek iratzartuko dituzte bizilagunak, etxerik etxe joanda. Gero, 10:00 bueltan, Ikazkin Trail mendi lasterketako korrikalariak pasatuko dira Areantzatik, eta 32. postuan doana saritu egingo dute. Meza izango da eguerdian (12:00), auzoan hil direnen alde, eta bukatutakoan, mokadutxoa eskainiko dute eta ginkanari ekingo diote (13:00). Arratsaldean (17:45), Areantzako jolasetan jardungo dute.
Domekan, Kurtzebarri Egunarekin bat egingo dute eta hara joango dira; behin tontorrean (12:00), aurtengo argazki ofiziala aterako dute auzotarrek. Martin Kabarrixa agurtuta, bukatutzat emango dituzte jaiak.