Udako solstizioari ondoetorria egiteko ekitaldiak berreskuratuko dituzte eguenean, San Juan bezpera. Leizarra musika eskolako kideek Plaza dantza eskainiko diete bertako dantzariei, gurasoei eta gainerako herritarrei (18:00). Ondoren, kalejiran irtengo dira buruhandiak eta erraldoiak, txistulariek lagun eginda (19:15), eta gero, erromeriari ekingo diote Herriko Plazan, Gabezin taldearekin (20:45). Gau parteko ekitaldiak dantzariek abiaraziko dituzte; Mitarte kaletik iritsiko dira plazara kalejiran (22:15), eta sanjuanetako zortzikoa dantzatuko dute, eta sua isiotu gero. Itzalitakoan, zezensuzkoa irtengo da.
Tantaia, 2004an jaiotakoek
Bestetik, 2004an jaiotako neska-mutilak –90 inguru, guztira– goizean goiz joango dira tantai bila. Eguerdi parterako eroango dute Durana kalera, eta hori zuritu. Sua itzali ostean hasiko dira altxatze lanetan, eta, behin igota, ohitura den legez, gazta eta ardoa banatuko diete elkartutako herritarrei.
Iratzeak atarietan
Sasoi baten egiten zen legez atarien aurrealdeetan iratzeak botatzeko ohitura du herritar talde batek eta aurten ere badute horretarako asmoa. Hala, San Juan egunez, herriko etxebizitza guztietako eta taberna eta dendetako aurrealdeak agertuko dira irekin. Eta atari batzuetan lorez apaindutako egurrezko gurutzeak jarriko dituzte.