Herririk herri dabil kapsula hori Gipuzkoa 2040 urtean nola irudikatzen duten gipuzkoarrek jasotzen, "lan-ildoak identifikatu ahal izateko eta interes sozialak agenda publikoan txertatzeko". Herritarrek ekarpenak eta proposamenak egin ahal izango dituzte eta ideiak eta kezkak erakutsi modu interaktiboan planteatutako partaidetza-dinamika bati esker.
Ekarpenak egitearen truke loreontzi txiki bat eta hazi batzuk jasoko dituzte; horiek lurperatu ondoren landare bihurtuko dira: "Herritarrek lurraldearen etorkizunarekin duten konpromisoaren garrantziaz ohartzeko ariketa da hau, eta bakoitzaren lanak ematen dituela sinbolizatzeko modu bat".
Dagoeneko 24 herritan
Aldundiaren Etorkizuna Eraikiz estrategiaren barruan dagoen gobernantza kolaboratiboa sustatzeko asmoz sortutako ekimen parte-hartzailea da. Dagoeneko 24 herri eta lau unibertsitate bisitatu ditu, eta 3.500 ekarpenetik gora jaso dituztela jakinarazi dute. Herritarren laguntza garrantzitsutzat jo dute "lehentasunak zehazteko, proiektu eta politika publikoak antolatzeko eta kudeaketa hobetzeko".