2017ko abuztuan Pirinioetako Balaitus mendian hil zen Mikel Crespo, eta, mendia haren zaletasun handia zenez, hala ekingo diote egunari haren senideek, lagunek eta gertukoek; hau da, mendira igotzen. 09:00etan, Kurtzebarrira igotzeko deia egin zuten, baina, tenperatura beroa iragarrita dagoenez, 08:00etan elkartuko dira, Mendiolan batu, eta handik gora, Kurtzebarrira igotzeko. 11:00etan, hamaiketakoa, Elizabarrin. 13:00etan, triki-poteoa egingo dute, Urbaltzen hasita, eta 90 lagun inguru batuko dira Taberna-Berrin bazkaltzeko. 18:00etan, elektrotxaranga eskainiko du Upeidek, eta ordu pare batez erdiko kalea girotzen arituko dira. 20:00etan, berriz, bertako taldeen apustua eginaz, Tabu, Banana Shake eta Jasan taldeen kontzertuak izango dira Arlutzeko kantxan.