Maiatzaren 12an hasitako parte-hartze prozesuaren xehetasunak eman dituzte Unai Elkoro alkateak, Koldo Zubillaga Kirol zinegotziak eta Ibai Larrabe udal arkitektoak, eta datorren asteko bozketa iragarri. Bilera hartan parte hartutako herritarrek as- kotariko aukerak proposatu zituzten. "Proposamen horiek ikuspuntu teknikotik aztertu dira, bideragarritasuna ebaluatuz eta hiru aukera posibletan egokituz", azaldu du alkateak. Zubillagak gogoratu gura izan du 2021eko aurrekontuetan jaso zutela parte-hartze prozesu hori, baina atzeratu egin behar izan zutela, "pandemiak aurrekontuak berrantolatzera eta lehentasunak ezartzea behartu zuelako". Aurten, proiektuari heldu gura izan diote: "Parte-hartze prozesu berri baten barruan, aisialdiaz eta kirolaz gozatzeko espazio honen erabilerak nola osatu adosteko".
Gaineratu du bozketaren emaitzak zehaztuko dituela ondorengo pausoak: "Emaitza jakin arte itxaron beharko da exeku- zio-epeen estimazioa egin ahal izateko, alternatiba bakoitzaren dimentsioa eta kostua ezberdinak dira eta".
Hiru aukera
Hiru proposamenen artetik bakarra hautatu beharko da. Lehenengoan proposatu dituzte berdegunean egokitzea zuhaiztia, ur-jolasak, mahaiak eta lasai egoteko lekua; kirol ekipamendu txikiak ere sartu dira: kalistenia, ping-ponga eta mahai-jokoak.
Bigarrenean, kirolari eman diote lehentasuna, honako hauek jarrita: kirol askotariko pista ireki bat eta beste bat estalia, ping-pong mahaiak, kalistenia, minibasket kantxa bat eta padel pista estaliak.
Eta hirugarrenean planteatu dute lasai egoteko gune bat egokitzea berdegunean, zuhaitzekin, mahaiekin, ur-jolasekin eta kirol ekipamendu txikiekin. Eta, era berean, Markole auzoaren inguru hori oinezkoentzat egokitzea proposatu da; hala, padelerako edo beste kirol modalitate batzuetarako ekipamendu estaliak kokatu ahal izango dira futbol zelaiaren ondoan –zirkulazioarendako itxita eta aparkalekuak kenduta–.
Astebete botoa emateko
Botoa emateko epea zabalik izango da ekainaren 13tik 17ra bitartean. 6 urtetik gorakoek –2016an jaiotakoak barne– bozkatu ahal izango dute –Aretxabaletan erroldatutakoak–. Arkupen eman ahal izango da botoa, edo online –lotura, aretxabaleta.eus webgunean–, norberaren datuak beteta.
