75 urte ez dira berehalakoan betetzen eta UDAk urte osoko egitaraua gertatu du ospatzeko. Gaur dute egun handia eta festa da nagusi Aretxabaletako kaleetan. Goizean jokatu da 3x3 txapelketa, Ointxeren eskutik, Mitarteko kantxan. Alebinen street futbola ere egon da Kurtzebarri eskolako kantxan. Gustura ibili dira gaztetxoak.
Eguerdian buruhandien eta erraldoien txanda izan da. Arrasateko gaitariekin ibili dira kalean behera, kalean gora. Bien bitartean usain goxoa zegoen plaza inguruan. Elorrio aldetik ekarritako txahala egon da brasan gauerditik. 500 razio paella ere plazan prestatu dituzte UDA inguruko hainbat lagunek. 14:00etan hasi dira banaketarekin. Ilarak sortu dira.
Arratsaldean gehiago
Mus txapelketa eta kuadrillen arteko jokoak dituzte iragarrita Aretxabaletan 16:00etatik aurrera. Iluntzerako, berriz, Gozategi taldeak girotuko du UDA Eguna.
