Maiatzaren 30ean, astelehena, gitarra-joleak igoko dira oholtzara, eta martitzenean, baxu elektrikoa jotzen ikasten dihardutenak; bi emanaldiak, 18:00etan dira.
Ekainaren 7an, ostera, piano-joleen txanda izango da (18:00); 10ean, konbo taldeena (19:00); eta 14an, kantu-taldearena (19:00). Ekainaren 21ean, gainera, ikasturte amaierako kontzertua eskainiko du musika eskolak Herriko Plazan, 18:00etan.
Bandaren kontzertua
Musika eskolako bandak, ohitura duen legez, kontzertua emango du 7x7 Kultura kalean ekimenaren baitan. Ekainaren 17an izango da, Santa Ritako lorategian (19:00). "Ekainean, Pasaian egingo den Musikaldira joango gara, eta harako gertatzen gabiltzan piezak joko ditugu, batez ere. Horrez gain, Meat Loaf abeslariari omenalditxoa egingo diogu", azaldu du bandako zuzendari Jon Lopezek. 25-30 kide inguru ditu taldeak, helduak batzuk eta gazteak asko: "Eta helburua da gazteei bandan eustea; horretarako dihardugu lanean".
