Gazteak kooperatibismora gerturatzea eta kooperatibismoa balioan jartzea helburu izan du 2022ko lehiaketak, eta horregatik, Euskadiko Kooperatiben Goren Kontseilua izan da babesle nagusia. Antolatzaileek –Aretxabaletako Udala, Mondragon Unibertsitatea, Arteman eta Arizmendi ikastola– iragarri dute iaz baino zortzi lan gehiago jaso dituztela eta pozik agertu dira. Aurkeztutako lanen artean 29 dira 18 urtetik gorakoek egindakoak, eta 66, 18 urtetik beherakoek egindakoak.
Debagoieneko herri gehienetatik jaso dituzte lanok baita Euskal Herriko leku askotatik ere: Urruña, Arrigorriaga, Durango, Donostia, Gasteiz, Getxo, Legazpi, Bermeo, Sopela, Beasain, Errenteria, Azkoitia, Ataun, Idiazabal...
Sari banaketa ekainaren 2an
Publikoak ere izango du gustukoena hautatzeko aukera, hemen; dagoeneko zabalik dago botoa emateko epea, hilaren 27a arte. Boto gehien jasotzen dituenak 500 euroko saria jasoko du.
Sari banaketa ekitaldia ekainaren 2an izango da, Aretxabaletako Arkupe kultur etxean. Eta 3.000 euro baino gehiago banatuko dituztela saritan iragarri dute. Hona hemen sariak:
Sari nagusiak:
- Spotik onena (1.000 euro).
- Publikoaren saria (500 euro).
- Gazteen saria (14-18 urte) (500 euro).
- Musika sinkronizazio onenaren saria (300 euro).
Sari gehigarriak:
- Mondragon Unibertsitateko ikasleen spotik onena (500 euro).
- Arizmendiko ikasleen spotik onena (250 euro).