LGTBIfobiaren Aurkako Nazioarteko Eguneko aldarrikapenekin bat egin du Aretxabaletako Udalak

Homofobiaren, Transfobiaren eta Bifobiaren Aurkako Nazioarteko Eguna da maiatzaren 17a eta Aretxabaletako Udalak, adierazpen instituzional bidez, "errespetuan eta berdintasunean oinarritutako jendartea eraikitzeko lanean" jarraitzeko konpromisoa hartu du.

LGTBI kolektiboa "gehien kolpatu" dutenetako bat izan dela pandemia sasoian adierazi dute Udal ordezkariek, eta diskriminazioen aurkako borroka sendotzen segi behar dela gaineratu. Hala, lanean jarraitzeko konpromisoa hartu du eta LGTBIfobiaren aurkako Nazioarteko Eguneko aldarrikapenekin bat egin.

Hona hemen adierazpen instituzionala osorik:

"1990eko maiatzaren 17tik, OMEk homosexualitatea gaixotasunen zerrendatik kendu zuela ospatzen da. Horregatik, LGTBI kolektiboetako pertsonentzat balio esanguratsua du, eskubideen aldeko eta diskriminazioaren aurkako jardueren ardatz katalizatzaile gisa, gaur egun oraindik ere aurre egin behar baitio araudiarekin bat ez datorren pertsona orok. Pandemiaren eraginez azken bi urteak benetan latzak izan dira herritar guztientzat, are gehiago LGTBI kolektiboarentzat, gehien kolpatu dutenetako bat izan baita. Izan ere, desberdintasunaren arrakala areagotu egin da eta kalteberatasun-egoerak eremu askotan indartu dira, sare sozialetan esate baterako.

Beharrezkoa da gure jendartean oraindik indarrean dauden diskriminazioen aurkako borroka sendotzen jarraitzea, askotan ikusezin bihurtzen diren genero-identitate, genero-orientazio eta genero-adierazpen guztiak errespetatuak izan daitezen. Jendarte osoaren erantzukizuna da diskriminazio eta indarkeria mota guztien aurka borrokatzen jarraitzea.

Herritar guztion zeregina da ahaleginak batzea jendarte inklusibo eta anitza lortzeko, aniztasuna aztertzen ari garen esparrutik ulertuta, baina baita zentzu zabal batean ere.

Aretxabaletako Udalak bat egiten du LGTBIfobiaren Aurkako Nazioarteko Eguneko aldarrikapenekin, eta errespetuan eta berdintasunean oinarritutako jendartea eraikitzeko lanean jarraitzeko konpromisoa hartzen du. Halaber, gure bizilagunei dei egiten diegu eskualdean egingo diren elkarretaratzeetan parte har dezaten".

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.