Santakurtz kaleko Hornidura eta Saneamenduko Plan Bereziko obrek bigarren faseari ekingo diote apirilaren 19an. Eta, aldaketa nabarmenak ekarriko ditu zirkulazioari dagokionez. Batetik, Iparragirre kalean, Amets taberna dagoen kalean, zirkulazioari itxiko dute. Hala, ibilgailuak Otalora kalera bideratuko dituzte Sarasate hegoaldetik, Exprex taberna dagoen tokitik, eta horrek zirkulazioaren noranzkoa aldatuko du lanak egiten dituzten bitartean. Exprex tabernatik Santakurtz aldera igarotzeko aukera izango dute Sarasate, Elkano, Guridi eta Iparragirre kaleetako bizilagunek, oraindik obretan ez dauden zatietan aparkatu ahal izateko.
Bost fase Santakurtz berrurbanitzatzeko
Santakurtz kaleko obrak Sasoi Eraikuntzak enpresari esleitu zitzaizkion, 2.042.500 eurotan. Esku-hartze eremuak Kurtzebarri Eskolako eraikinaren amaieratik herriko sarreran dagoen erdi-biribilguneraino hartzen du, baita Santakurtz ondoko kaleak ere. Lanen garapena inguruko bizilagunen egunerokoa bateragarri egiteko, hirigintzako esku-hartzea faseka egiten ari da.