Gipuzkoan zehar aretoen zirkuitua antolatu du Galtzagorri elkarteak seigarren aldiz, eta horietako bat, Adur, adur, ez naiz zure beldur Aretxabaletako liburutegian izango da gaurtik ostiralera arte. Ikastetxeetako ikasle taldeak pasatuko dira bertatik eta liburutegiaren
ordutegian ere irekita egongo da aretoa, helduek eta familiek ere bertako liburuak eta arte-lanak ikus ditzaten eta horien gainean hausnar dezaten.
Galtzagorriko literatur aretoak jolas literarioak dira, eta haurrek modu aktiboan hartzen dute parte, Galtzagorri elkarteko dinamizatzaile batek proposatutako jolasean. Bakoitzak gai zehatz bat jorratzen du, eta oraingoan, beldurrari helduko diote. Horretarako Juan Kruz Igerabidek idatzitako eta Aizkorri argitaletxeak argitaratutako Jonas eta Hozkailu Beldurtia liburua erabiliko dute.
Helburuak
Saioaren helburuak honako hauek dira: beldurraren trataera haur literaturan ezagutzea; barruko mamuak eta kanpoko mamuak lantzea; era horretako adierazpen literarioen ezagupena eta azterketa egitea; eta haurrak beldurrari aurre egiteko literaturak eskaintzen dizkion tresnak ezagutzea.
