Urte hasieran neska-mutikoendako antolatu izan den Gabonetako parkerik ez da egin aurten, COVID-19aren eraginagatik.
Orduan bertan behera utzi zena orain dator: apirilaren 11n eta 12an, hain zuzen ere, Aste Santuko oporren atarian; ekintza mordoa izango dituzte Ibarra kiroldegian.
Goizez eta arratsaldez
Jolas parkea 3 eta 12 urte bitarteko neska-mutikoei bideratu diete, eta, besteak beste, honako hauek izango dituzte: puzgarriak, ohe elastikoak, jolasak, tailerrak eta Xbox jolas digitalak. Parkearen ateak goizez –11:00-13:00– eta arratsaldez –17:00-20:00– zabalduko dituzte.
Prezioei dagokienez, eguneko sarrerak sei eurotan eskainiko dituzte; bi eguneko bonuek, ostera, hamar euroko prezioa izango dute. Hirugarren seme-alabek debalde sartu ahal izango dute, betiere, familia ugariaren txartela aurkeztuta.
