COVID-19ak hala behartuta, 2021eko Gabonetako parkea bertan behera utzi behar izan zuten. Orain, bestelakoa izanik egoera, udaberriko haur parkea antolatuko du Udalak; apirilaren 11rako eta 12rako, hain zuzen ere. Horretarako, hamahiru begirale behar dituzte, eta izena emateko epea zabalik dago; azken eguna martxoaren 25a da. Curriculumak udaletxean utzi behar dira, edo helbide honetara bidali: gazteria@aretxabaleta.eus.
Eskatzen direnak
Parkean begirale izateko bi baldintza eskatu dituzte: 18 urte beteta izatea eta euskaraz ondo jakitea. Era berean, honako hauek ere kontuan hartuko dituzte: ikasketak –umeekin zerikusia dutenak–, begirale titulua, Gabonetako parkean esperientzia, udaleku irekietan edo itxietan parte hartu izana eta EGA titulua. Aretxabaletako gazteek lehentasuna izango dutela adierazi dute Udaleko ordezkariek.
Parkea 3 eta 12 urte arteko neska-mutikoei bideratuta egongo da eta puzgarriekin batera eskulanak egiteko eta Wii-arekin jolasteko txokoak egongo dira.