Aretxarte merkatarien elkarteko kideak Ixadebalde merkealdien azokari begira jarrita daude azken egunotan. Martxoaren 3tik 5era bitartean, udazkeneko eta neguko jeneroa aterako dute gehienek saltokien aurrealdera, eta jatekoa ere bai beste batzuek.
Hamaika merkatari
Hamaika merkatarik egin dute bat 2022ko lehen Ixadebalde azokarekin. Arropak, osagarriak eta oinetakoak eskainiko dituzte besteak beste, honako hauek: Amaia ume denda, Asensio, Belar Meta, Haurrak, Kilima, Titare, Almila Shop, Tak eta Zubia. Eta jatekoa eta edatekoa izango dute, Kilokak eta Hankabeltz urdaitegiak.
Aurreko aldietan legez, eskaintza "politak" dituztela herritarrendako iragarri dute: "Kalitateari eutsita prezio ezin hobeak eskainiko dizkiegu". Haurrak dendako Silvia Alvarezek onartu du sasoi "zaila" izan dela, eta orokorrean, jenero asko geratu dela dendatan: "Azokak hori ateratzeko aukera emango digu". Horregatik, aprobetxatzeko dei egin die aretxabaletarrei.
Zozketak bezeroen artean
Saltokien aurrealdean jarriko dituzte produktuak hiru egunetan: martxoaren 3an eta 4an goizez –10:00-13:00– eta arratsaldez –16:30-20:00– eta 5ean, zapatuan, goizez –10:00-14:00–.
Oraingoan, ez dute antolatu kalea girotzeko ekitaldirik, baina opariak bai, horiek izango direla aurrekoetan legez iragarri dute. Merkatari bakoitzak 50 euroko bonuak zozketatuko ditu erosketak egin dituzten bezeroen artean, Ixadebaldek ateak itxitakoan.
Merkatarien iritziak
Uxue Eraña (Belar Meta jantzi denda): "Beherapenen ondoren geratutako arropa kentzea komeni zaigu jenero berriari lekua egiteko; hortaz, azoka oso ondo datorkigu".
Alberto Asensio (Asensio jantzi denda): "Beherapenetako arropak aterako ditugu; ekonomikoki ez da errentagarria, baina jeneroa kentzeko egokia bai. Gainera, kaleak girotzen ditu".
