Basotxo erretiratuen elkarteak jakinarazi du ohiko lan-jardunari heldu eta bertan behera utzitako ekintzei helduko dietela martxoan. Honela adierazi du Aitor Alberdi presidenteak: "Koronabirusak eragindako osasun egoera gainditzen hasi gara, eta, neurri murriztaileak kendu dituztenez, jarduera guztiak abiaraziko ditugu".
Donostiara martxoaren 24an
Martxoaren 1ean ospatu izan duten Aingeru Guardakoaren eguna, zaindariarena, atzeratu egin dute: "Ez da bertan behera geratu, eta data berria zehazterakoan jakinaraziko zaie bazkideei".
Txangoei dagokienez, dagoeneko hasi dira antolatzen. Martxoaren 24an, eguena, Donostiara joango dira, goiz-pasa; gero, Urnietako Oianume sagardotegian bazkaldu eta iluntzean itzuliko dira. Izena emateko epea zabalik dago, martxoaren 16ra arte; Basotxotik pasatu behar da, 11:00etatik 12:00etara. Arkupen emango dituzten ikastaroak antolatzen ere hasi direla gaineratu du.