Udaberri txapelketako jaialdia antolatu zuten atzo, egubakoitza, Aretxabaletan. Guztira sei partidu jokatu zituzten. Alebin eta infantil mailako partiduak izan ziren, eta bertan lehiatu ziren, etxeko pilotariekin batera, Azkoitiko, Ataungo, Orioko eta Ilunpeko pilotariak. Gaur, zapatua, partidu gehiago izango dira Debagoienean, eta baita bihar domeka ere.
Hain zuzen ere, gaur, zapatua, minutu gutxi barru –gozeko 11:00etan– beste hiru partidu jokatuko dituzte Aretxabaletako Iturrigorri pilotalekuan, eta horiek gazte mailako eta seniorretako partiduak izango dira. Oñatin, berriz, 16:30ean hasita etxeko pilotariek tolosarrak, Belokikoak eta ataundarrak izango dituzte aurrean, eskuz binaka kadete eta nagusien mailan. Arrasaten, 18:30ean hasiko dituzte partiduak eta hor kategoria txikietakoak izango dira protagonista, alebinak eta infantilak.
Bergaran, domekan
Asteburuko karteldegia amaitzeko, Bergaran domeka goizean jokatuko dituzte norgehiagokak. 11:00etan hasita infantil mailako partidu bat eta senior mailako bi partidu jokatuko dituzte.
