Bizitzakideak taldea sortu da Aretxabaletan. Ohar bidez adierazi dutenez, "ez gara nor legez babestua den informaziorik besteei eskatzeko, are gutxiago informazio hori agerian uzteko"; ondorioz, Covid Ziurtagiri Digitalaren aurka osatu da taldea, tabernetan, jatetxeetan, dantzalekuetan, kiroldegietan edota erresidentzietan ziurtagiria eskatzean, herritarrok "kontrol sozialerako eta bazterketarako baliatu nahi gaituztela" argudiatuta.
"Edonoren txertoaren gaineko hautua agerian uztera behartzen gaituzte", adierazi dute, eta bide horretan, "bazterketaren aurka, eta bizitzaren eta guztiontzako giza eskubideen alde" eratu dute taldea. "Bazterkeriari muzin" egin eta "egiazko zibismoa" sustatzea dute helburu, eta desobedientziaren bidea albo batera utzita, aretxabaletarrei "giza eskubideen defentsan bat egiteko" deia egin diete.
Elkarretaratzea
Bide horretan, pasa den abenduaren 23an egin zuten lehen elkarretaratzea herriko plazan. 80 bat pertsona bildu ziren Covid ziurtagiriari ez! zioen pankartaren bueltan.