Pandemiak atzeratutako txapelketa –martxoan ziren egitekoak– izango da bihar, zapatua, Ibarra kiroldegian, eta punta-puntako karatekak elkartuko dira. Euskal Autonomia Erkidegoko 80 kirolari inguru izango dira tatami gainean, guztiak senior mailakoak, eta, 10:00etan hasita, kumite zein kata modalitateetan lehiatuko dira.
Gipuzkoarrak "uste baino gutxiago" elkartuko direla adierazi dute antolatzaileek, baina Azkoitikoek, Pasaiakoek eta Irungoek Ibarran izango direla berretsi dute, baita Debagoienekoak ere, eta horien artean UDAko ordezkariak daude: Joanna Perez eta Odei eta Oxel Vazquez anaiak.
"Maila handiko lehiak ikusiko dira, probintzia bakoitzeko onenak elkartuko direlako", adierazi du Odilo Vazquezek, UDAko karateken entrenatzaileak eta txapelketaren antolatzaileak; horregatik, karatea gustuko dutenak txapelketa bertatik bertara jarraitzera gonbidatu ditu. Kata modalitateko norgehiagokekin ekingo diete; hau da, karate mugimenduak eginda. Eta ondoren, borrokekin jarraituko dute. Vazquez anaiek zein Perezek jardungo dute kumitean, eta azken horrek, katan ere bai.
