Nerabeen arteko indarkeria matxista kasuak detektatzeko "jarraibide argiak" dituen protokoloa zehaztu du Udalak; garrantzi handia eman dio hori saihesteko prebentzioari. Hiruki Larroxa elkartearen gidaritzapean garatu dute, eta lanketa horretan izan dira herriko hainbat eragile: Udaleko Gazteria Saila eta Berdintasun Saila, gaztelekuko hezitzaileak, kale hezitzaileak eta UDA.
Aretxabaletako nerabe eta gazteen artean ematen den indarkeria matxistaren aurkako protokoloa-k hiru atal nagusi ditu: prebentzioa eta sentsibilizazioa; detekzioa; eta arreta eta jarraipena. Udaletik jakinarazi dute nerabeekin lan egiten duten profesionalentzako jarraibideak eskaintzen direla, indarkeria matxista egoerak identifikatu eta erantzuna emateko; betiere, prebentzioan eta sentsibilizazioan fokua jarrita.
Protokoloa herriko eragileei aurkeztuko die Udalak eguaztenean, hilaren 27an, Arkupen (18:00).