Pandemiak eragindako etenaren ondoren, ateak zabalduko ditu Kuku Miku elkarteak udazkenean. Luze egin zaie urte eta erdiko itxaronaldi hori, eta bertako kideek uste dute "hutsune handia" izan dela hainbat familiarendako. Horregatik, "gogotsu" datoz bueltan, eta egitarau dotorea gertatu dute ikasturteari "indartsu" ekiteko eta elkartea ezagutzera emateko guraso berrien artean.
Familientzako txokoa
Durana kalearen atzeko partean Udalak duen lokalean elkartzen dira Kuku Mikuko kideak. Azken urtean, baina, "lokal beharra" izan du Udalak pandemiaren eraginez, eta ludotekako umeendako beste gune bat egokitu dute han. Horregatik, oraingoz, aste bukaeraetan zabalduko dituzte bertako ateak Kuku Mikukoek. 0 eta 6 urte bitarteko umeak dituzten familiendako txokoa da eta bazkide sistema erabiltzen dute. Orain dela bi urte, 45 familia zeuden izena emanda; iaz, baina, baja asko izan ziren eta 31 familiatara jaitsi zen bazkide kopurua. "Pandemiak zeresana izan zuen, baina bazkide errotazioa ere handia da gure elkartean; umea koskortu ahala joan doaz batzuk eta jaioberriekin etorri beste batzuk", azaldu du zuzendaritzako kide Oihana Garcia Insaustik. Hain zuzen, horregatik, familia berriei ezagutzera eman gura diete elkartea, eta bazkide egiteko epea zabalduko dute urriaren 16tik azaroaren 15era bitartean. Izen-emate fitxa bete beharko dute interesa dutenek, eta egoitzako postontzian sartu edo helbide honetara idatzi: kukumikuelkartea@gmail.com. Bazkideek 35 euroko urteko kuota ordaintzen dute –guraso eskola eta gimnasio saioak erabiltzaileak ordaintzen ditu– eta familia bakoitzari egoitzako giltza ematen zaio. Hala, ezarritako ordutegiaren barruan, edozein unetan erabil dezakete txokoa –beste ekitaldiren bat ez badago–.
Ia hamar urteko ibilbidea
Orain dela hamar urte guraso batzuek herrian atzemandako hutsuneei erantzun nahian jarri zen martxan Kuku Miku. "Espazio falta, elkartzeko toki falta, hezkuntzaren gainean hausnartzeko foro falta igarri zituzten, besteak beste, eta behar horretatik hasi ziren elkartzen", azaldu du Garcia Insaustik. Beste herri batzuetako ereduak aztertu zituzten lehenengo, eta ondoren, Udalarekin jarri ziren harremanetan. Hitzarmena sinatu zuten harekin lokal bat erabili ahal izateko, eta 2012ko ekainean eratu zen elkartea. Hasieratik zehaztu zuten haurren garapenerako elkartea izango zela, gurasoendako eta umeendako topagunea, eta ez ludoteka, ezta liburutegia ere. Euskara oinarri izango zen, gainera, eta horren erabilera sustatzea ere helburuen artean sartu zuten.
Kuku Mikuren beste ezaugarrietako bat izan zen ikastetxe bati loturik ez egotea. Indargunea dela hori uste dute orain ere: "Ikastetxe ezberdinetako gurasoak elkartzen gara, bestela elkartuko ez ginatekeenak". Herrikoak bertakoak ez diren gurasoendako lagungarri dela hori diote
Orduko helburuek bere horretan jarraitzen dute: "Familiendako elkargune bat da, arratsaldeetan edo asteburuetan elkartzeko toki bat; batetik, jendea ezagutzeko, harremanak sortzeko, umeendako espazio egoki bat izateko… Eta bestetik, gurasotasunaren bide horretan bidelagun izateko eta formakuntza eskaintzeko". Horretarako, hainbat ekintza antolatzen dituzte; batzuk iraunkorragoak dira, guraso eskola, esaterako, eta beste batzuk aldizkakoak, hala nola hitzaldiak eta formakuntza saioak. Noizbehinka, familiendako edo umeendako ekitaldiak ere izaten dituzte: ipuin kontalariak, kultura tailerrak eta abar.
Horrez gain, lan ildoen artean dute jasota herriko elkarteekin lankidetzan jardutea. Hala, Loramendirekin badute egitasmo bat abian –azken urte eta erdian etenda egon bada ere–: Auzoko Txiki. Kanpotik etorri berri diren familiak eta bertakoak hilabetean behin elkartu izan dira, elkarrekin jolastu eta arratsaldea pasatzeko.
Era berean, Udalarekin elkarlanean ere jardun izan dute, eta Hezkuntza Mahaian parte hartu.
Bi talde eratuta
Elkartearen bueltan bi talde iraunkor daude sortuta: batetik, guraso eskola dago; hamabost bat lagun elkartzen dira hilabetean behin eta Nerea Mendizabal psikopedagogo eta gizarte hezitzaileak gidatzen ditu. Hainbat arlotako gaiak lantzen dituzte, eta gurasoek dakartzaten kezkak eta beharrak konpartitu.
Bestetik, haurdunaldia gertatzeko eta erditze ostean laguntzeko saioak eskaintzen dituzte, gimnasia hipopresiboak eta TAD eta 5P metodoan oinarritutako saioak. Sane fisioterapia zentroko Ane Remedios aretxabaletarrak dihardu horretan eta astean behin elkartzen da hiru talderekin.
Udazkenerako egitaraua
Elkartea zein egoitza bera ezagutzera emateko lau ekintza antolatu dituzte urriaren 16a eta azaroaren 15a artean. Umeendako zein gurasoendako ekintzak izango dira eta ez dago aurretik izenik eman beharrik –edukera bete arte–, ezta bazkide izan beharrik ere, nahiz eta lehentasuna izan azken horiek.
Urriak 16, zapatua (17:30)
- • Jolasak: Esperimentazio gunea. 0-4 urteko umeendako txokoak: eraikuntza-jolasak, argi-mahaia, harea… Txatxilipurdiko hezitzaileekin. Kuku Mikuren egoitzan.
Urriak 20, eguaztena (17:30)
- • Tailerra: Haurren larrialdietarako lehen sorospenak. Bea Pacho pediatraren eta Larraitz Iturbe erizainaren eskutik. Komentuan.
Azaroak 5, egubakoitza (18:30)
- • Dokumentala: Haztarnak-Huellas. Ondoren solasaldia J. Ramon Mauduitekin, Donostiako Hazi Hezi prebentzio-guneko zuzendaria. Arkupen.
Azaroak 15, astelehena (17:30)
- • Hitzaldia: Komunikazio ez-bortitza. Txikiekin komunikatzeko gakoak lantzeko saioa Nerea Mendizabalekin. Komentuan. Oharra: ekintzak debaldekoak dira – dokumentala izan ezik–.
"Umearendako zein familiarendako topagune goxo bat da elkartea"
Oihana Jausoro eta Oihana Garcia Insausti zuzendaritzako kide dira, eta abian jarritako bazkidetza kanpainarekin elkartea sendotu gura dute.
Zein da aurtengo erronka?
Azken urte eta erdiko etenaldiak elkarteari berari ere eragin dio, eta hori indartzeko, familia kopuru txukun bat elkartu gura dugu Kuku Mikuren bueltan. Horretarako, ezagutzera ematea da aurtengo erronka. Hortik abiatuta, familia berriekin transmisio lana ondo egin gura dugu; umeak koskortu ahala alde egingo dugu orain gaudenok, baina elkarteak jarraipena izango du.
Gurasoen eta umeen beharrei erantzutea da elkartearen helburua?
Familien bidelagun izatea eta formakuntza beharretan laguntzea dago, batetik, eta umeendako ekintzak antolatzea eta elkargunea izatea familiendako, bestetik.
Bertatik pasatutako gurasoen aldetik zer jaso duzue?
Oso ondo baloratzen dute. Gu geu, esaterako, ez gara aretxabaletarrak, eta jendea ezagutzeko tokia izan da. Umea sozializatzeko gunea ere bada; bereziki, lehen urteetan etxean haztea erabaki dutenentzat. Umearendako zein familiarendako gune goxo bat dela uste dugu.