Hainbat lan egiten dabiltza Urkulu inguruan abuztuaren 9az geroztik. Prebentzio eta mantentze lanak direla adierazi du Ur Kontsortzioak eta Construcciones Zubieder enpresari eman diote horien ardura. Lanen kostua 61.182 eurokoa da.
Mendi ezpondari eusteko
Urtegiaren sarrerako errepidearen ondoan –presaren alboan– dagoen mendi ezpondari eusteko egin beharreko lanak direla zehaztu dute; izan ere, gune horretako lurrak beherantz joanda zeuden. Hain zuzen ere, ingurua gertatzeko hainbat zuhaitz moztu zituzten uztailaren bueltan, eta horrek jakin-mina eragin zuen herritarrengan. Ondo bidean, urriaren 1erako bukatuta izango dituztela zehaztu du Ur Kontsortzioak.
Urtegi inguruko ibilbidea ez dute itxi beharrik izan oinezkoendako zein bizikletan ibiltzera doazenendako; hortaz, ez dabil izaten aparteko eraginik aisialdia aprobetxatzera gerturatzen direnengan.
