Aretxabaletako pilotu Markel Uriarte (Orbea) eta Adiran Jurado (BH Bikes) enduroko lasterketetan izan dira asteburuan. Uriarte Ainsan izan da, Bucardo Enduro Openaren barruan Ainsan egin duten zirkuituko hirugarren hitzorduan, eta aretxabaletarra podiumeko lehenengo postura igo zen elite mailan, Iker Senarren eta Jon Otamendiren aurretik. Hala, bost tramuak batuta aretxabaletarrak 25.17an geratu zuen erlojua, bigarren sailkatua baino 30 segundo azkarragoa izan zen: "Enduroa ere eboluzionatzen dabil, eta gaur egungo lasterketak inoiz baino zentratuago daude maldan behera egin beharreko lanean; hau da, jaitsieretan azkar joan beharra dago". Aipatu behar da master 40 kategorian Zigor Urain arrasatearra bigarren sailkatu zela.
Adiran, e-bike kategorian
Eta emaitza berbera, lehengo postua, lortu du Adiran Juradok La Adradan (Avila) egin duten Espainiako Openeko bigarren hitzorduan. Kasu horretan, aretxabaletarra bizikleta elektrikoen kategorian lehiatu zen: "Oso pozik nago egindako lanarekin eta lasterketaren nondik norakoekin, jakinda oraindik hobetzeko tarte handia daukagula".