Santa Kurtzeko eta inguruko hainbat kaletako saneamendu eta hornidura plan berezia abian jartzeko lanak lizitaziora ateratzea onartu zuen udalbatzak eguaztenean egindako ezohiko osoko bilkuran. Udal Gobernuaren babesa jaso zuen eta EH Bilduko zinegotziek abstentzioaren alde egin zuten.
Lanen aurrekontua 2.334.849 euro da –BEZa barne– eta 2021eko eta 2022ko udal aurrekontuetan sartuko dute horren ordainketa. Xabi Otxoa Hirigintza zinegotziak azaldu zuen udazkenean hastea dela asmoa eta urtebete iraungo dutela. Santa Kurtz kale inguruan bizi direnen egunerokoan "eragin handia" izango dute lanok eta pazientzia eskatu zieten udalbatzako kideek bizilagunei. Dena den, Otxoak argitu zuen larrialdi zerbitzuetarako sartu-irteerak bermatuko dituztela eta Tubos lantegi inguruan behin-behineko aparkaleku bat jarriko dela.
Kargu-uztea
Bilkura horretan, EH Bilduko kide Irati Pagoagak zinegotzi kargua utzi zuen. Sei urte egin ditu, guztira: "Aberasgarria eta une batzuetan gogorra izan da, exijentzia handikoa ere bai. Baina elkarlanerako gogoa topatu dut, diferentziak diferentzia". Udalbatza osatzen duten kide guztiak zein udaletxeko teknikariak eskertu zituen, laguntzeko erakutsitako prestutasunagatik. Pagoagak utzitako lekua Naiara Olabarriak beteko du; asmoa da uztaileko osoko bilkuran kargua hartzea.