Ibilian Ibilian dinamikari ekin dio Sare Herritarrak, eta horren baitan dago biharko ekitaldia. Geziaren helburua beste espetxe politika baten aldeko adostasun soziala irudikatzea eta salbuespenezko espetxe politikaren amaiera eskatzea dela diote: "Gari Garciak Aretxabaletarako bidea egin dezan, graduen progresioan aurrera egitea ahalbideratuko duen espetxe politika arrunta aplika diezaiotela aldarrikatuko dugu. Horregatik, gonbidatuta zaudete erronkara elkarbizitzaren eta bakearen alde, konponbidearen alde eta preso eta iheslarien etxeratzearen alde bidea izan nahi duzuen guztiak".
Orain arteko erantzunarekin "pozik"
Pozik agertu dira Izan Bidea dinamikaren baitan maiatzaren 8an mendi tontorretara joateko deiak izandako erantzunarekin: "Euskal Herriko tontor ezagunenak igo genituen presoen eta iheslarien etxeratzearen alde eta elkarbizitzaren eta bakearen alde. Inoizko mendi igoera bateratu handienean, aretxabaletarrok bost tontorretara eraman genuen Gari Atxabaltara! deiadarra eta 400 herrikide baino gehiagok argi azaldu genuen urratsak egiteko prest gaudela, guztiok batera, egoera hau behin betiko amaitzeko".
Hala ere, oraindik asko dagoela egiteko uste dute, eta salbuespenezko espetxe politikari bukaera emateko lanean jarraitzeko gertu agertu dira.