Herriarteko txapelketari ekingo diote aste bukaeran eta UDAko pilotariek etxean dituzte lehenengo partiduak. Domekan, hilaren 16an, jokatuko dituzte, Iturrigorri pilotalekuan (11:00).
Kadeteek, gazteek eta nagusiek jardungo dute nor baino nor gehiago eta Hernaniko pilotariak izango dituzte aurrez aurre. Juan Mari Errasti entrenatzaileak taldea sortu izanari eman dio balioa: "Ez genuen hutsik egin gura; horregatik, parte hartzeko beste jende elkartzen saiatu gara eta aurrera egin dugu. Ea partidu txukunak jokatzerik daukaten eta tanto kopuru handia egin; oso garrantzitsua da hori".
Udaberri Txapelketa, aurrera
Bestetik, gaur, egubakoitza, Udaberri Txapelketari dagozkion bi partidu izango dira Iturrigorrin, (19:00). Gazteek Zaldibiako bikote bat hartuko dute eta nagusiek, Errenteriako bat. Hain zuzen, nagusiek joan den astean ez zuten jokatzerik izan, pilotari baten lesioagatik, eta oraingoan, bi partidu izango dituzte.