Gaur, eguaztena, Ganbaran aurkitu dudan altxorra izenburua duen ipuin kontaketa eskainiko die Iñaki Carreterok 4 eta 8 urte bitarteko neska-mutikoei. 18:00etan, izango da Arkupen.
Egubakoitzean, hilaren 23an, ostera, Maite Arrese narratzaileak eta Mau Ziemkiewicz musikariak Basatiaren mintzoa helduentzako ipuin musikatua aurkeztuko dute, Basatiaren mintzoa izenarekin. Clarissa Pinkola Estesek idatzitako Otsoekin korrika dabiltzan emakumeak liburutik ateratako ipuinak dira gehienak, baina euskal kondaira zahar bat ere badago tartean. 19:00etan hasiko da, eta sarrerak dagoeneko salgai daude (lau euro).
'Hitz-artea' ikuskizuna hainbat aretxabaletarrekin
Bost aretxabaletarrek, tartean idazle batzuk, jendaurrean irakurri bitartean Jokin Mitxelena ilustratzaile donostiarrak marrazkiak egingo ditu Hitz-artea ikuskizunaren baitan. Josune Murgoitio, Luis Errasti, Udane Oñate eta Judit Ruiz de Munain aretxabaletarrek hartuko dute parte besteak beste.
Apirilaren 30ean, egubakoitza, izango da, ekitaldia (19:00) eta izena aldez aurretik ematea kultur etxean gomendatu dute.
