Zirika Zirkus taldearen 'Zinemaz blai' antzezlana etzi, domeka

'Zinemaz blai' antzezlaneko une bat.

Domeka honetan, Zirika Zirkus taldearen Zinemaz blai antzezlana izango da, 17:00etan. Zinemaren mundua oholtzara eraman nahi izan du lan honetan Zirika Zirkus konpainiak, eta publiko familiarrarentzat zuzendutako saioa izango da. Sarrerak salgai daude, hiru eurotan, Arkupen bertan.

Asteburu honetako saioaz gain, apirila betea dator; izan ere, apirilaren 21ean, Ganbaran aurkitu dudan altxorra ipuin kontaketa izango da, udal bibliotekan, Iñaki Carreteroren eskutik, 18:00etan. Apirilaren 23an, berriz, Maite Arrese & Mau Ziemkiewicz musikariek Basatiaren mintzoa ipuin musikatua eskainiko dute, helduentzat, Arkupen, 19:00etan. Sarrera lau euro da.

Irati Garaitonandia aramaioarraren erakusketa

Horrez gain, Irati Garaitonandia aramaioarraren erakusketa ireki zuten hilaren hasieran, eta apirilaren 30era arte ikusgai egongo da, Marrazkiak izenpean. Askotariko materialak lantzen dituen arren, bere obraren zatirik handiena paperean egiten du 11 urteko gazteak.

Irati Garaitonandia 11 urteko aramaioarrak funtzio motorrari, hau da, muskuluen kontrolari, koordinazioari eta mugimenduari eragiten dion nahasmendu neurologikoa du. Alterazio horrek bizitza osoan jasan beharko duen desgaitasun bat dakarren arren, tratamendu eta maneiu egokiarekin, gizartean erabat integratutako bizitza izan dezake. Horregatik dira hain garrantzitsuak jarduera osagarriak edo eskolaz kanpokoak, Iratiren kasuan, musika eta pintura; izan ere, aisialdia aprobetxatzen laguntzeaz gain, gizarte-harremanak sortzen eta sendotzen eta osasun fisikoa hobetzen laguntzen diote. Iratik 6 urte daramatza pintura lantzen Idoia Elexpururekin. Bere lanak genero abstraktuan sar genitzake eta material ezberdinak lantzen dituen arren, bere obraren zatirik handiena paperean egiten du.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.