COVID-19aren pandemiak partidetako sarrerarik gabe, babeslerik gabe eta futbol zelaiko tabernarik gabe utzi du UDA. Gauzak horrela, indarrak batzeko deia egin du klubak: "Aurtengo bazkide-kuota aspaldian pasatako kuotarik garrantzitsuenetakoa izango da ziurrenik, eta beharrezkoa izango da aurrera egiten jarraitu ahal izateko".
Era berean, gutuna eskerrak emateko ere erabili du elkarteak. "Esan ohi da klub batek herriaren nortasuna jasotzeko gaitasuna behar lukeela izan. UDAren kasuan alderantziz da. Herriak ematen dio nortasuna klubari. Herritar, bazkide, zale, boluntario, babesle, kirolari… zareten horiek idatzi duzue UDA Kirol Elkartearen historia", dio oharrean.
"Kalitatezko zerbitzua" eskaintzea, entrenatzaile eta hezitzaileak trebatzea, aurrera kirola sustatzea eta osasuna bultzatzea dira besteak beste UDAren helburuak, eta ziurtzat jo dute orain arteko bideari jarraituko diotela.