Ixadebalde merkealdien azokak girotuko du herria egubakoitzean –10:00etatik 13:00etara eta 16:30etik 20:00etara– eta zapatuan –10:00etatik 13:30era–. 21. aldia izango da, eta aurten ere badago berritasunik; esaterako, elikagaiak eskaintzen dituzten saltoki bik bat egin izana.
Hamaika merkatarik jarriko dituzte postuak norberaren saltokiaren aurrealdean; hona hemen horiek: Amaia ume denda, Belar Meta, Asensio, Kilima, Hankabeltz, Tak, Titare, Kiloka, Zubia oinetakoak, Haurrak eta Txilarra. Gehienak arropa eta oinetako dendak dira eta udazken eta negu denboraldian saldu gabe geratutako jeneroa eskainiko dute: "Kalitate ona, prezio ezin hobeekin". Hankabeltzek eta Kilokak, ostera, elikagaiak eskainiko dituzte.
Azokak iraun bitartean kaleak girotzen saiatuko dira: "Ibai Zangituren laguntza izango dugu horretarako; hortaz, giro ona ziurtatuta dago", adierazi du Aretxarteko kide eta Kilima dendako Meritxell Serratok.
Ohitura duten legez, opariak ere izango dituzte azokara gerturatzen diren bezeroendako. "Gure dendetan gastatzeko bonuak zozketatu izan ditugu, eta aurten ere egongo dira. Horiez gain, beste era bateko saritxoak ere izango ditugu; otarreak, esaterako", dio Serratok
Eguraldiaren beldur dira merkatariak, baina herritarrak animatu dituzte postuetara gerturatzera: "Moldatuko gara, eta eskaintzek mereziko dute".
Herrian kontsumitzea helburu
Urtebete beteko da egunotan pandemia hasi zenetik, eta merkatariek egoerara moldatu behar izan dute. "Herritarren aldetik jaso dugun erantzuna ona izan da, bertan kontsumitu dute, eta, horren eraginez, askok, behintzat, balantze positiboa egin dugu", adierazi du Serratok.
Hain zuzen, herrian kontsumitzearen garrantzia azpimarratu gura dute egunotan, eta, azokan batzuek bakarrik parte hartu arren, komertzio guztiak jarri gura dituzte agerian.