Juan Mari Errasti entrenatzaileak "hala-moduz" hasi dutela txapelketa adierazi du: "Ager Lanzos jubenilaren aurkariak Beasaindik etorri behar zuen baina herria eremu gorrian zegoenez ezin. Eta Zugasti seniorraren aurkaria konfinatuta zegoenez, hori ere ez zen jokatu". Beste biek jardun zuten, emaitza gazi-gozoekin: Danel Lanzos kadeteak irabazi egin zuen 18-22 Oñatin, eta Joxe Uribetxebarria gazteak galdu 22-4, Lazkaon.
Pilotari gutxi
Entrenatzeko ez dutela arazorik azaldu du Errastik, Udalaren baimena daukatelako Iturrigorri pilotalekua zabaltzeko eta ixteko. "Arazoa da jende gutxi datorrela entrenatzera. Zenbat eta gutxiago etorri okerrago da, ohitura galdu egiten delako. Egia esan gazteak eta nagusiak, guztiak gaude apur bat nahastuta egoera honekin…". Gaineratu du eremu gorrira pasatzea izango litzatekeela okerrena: "Orduan bai ezingo genukeela entrenatu, ezta partiduak jokatu".
Gaur bi partidu etxean
Gaur, egubakoitza, bi partidu jokatuko dituzte Iturrigorri pilotalekuan, 18:30ean hasita: Uribetxebarriak Oñatiko Ugarteren aurka, eta ondoren, Zugastik Ibarguren legazpiarraren aurka. Lazkaon, ostera, jokatuko du Ager Lanzosek eta Danelek atseden hartuko du. "Herriz mugi gaitezkeen zalantza izan dugu, baina federazioaren baimenarekin joan ahal izango gara", esan du Errastik.