Zuzeneko laguntza horiek honela banatu dituzte: batetik, 300 euroko zenbateko finkoa eman diote bakoitzari; bestetik, 600 euro, lantaldeko langile autonomo bakoitzeko: ostalaritzako lokal horietako 20k langile autonomo bat dute; zortzik, bi; hiruk, hiru langile; eta batek, lau. Eta hirugarrenik, soldatapeko langile bakoitzeko, azaroari dagokion Gizarte Segurantzako kuota hartu du bere gain Udalak, 600 euroko mugarekin: zazpi eskaera soldatapeko langile bat duten lokalenak dira; bostek bi dituzte; hiruk, hiru; batek, lau; bik, bost; eta hamalauk ez dute soldatapeko langilerik.
Emandako laguntzak 900 eta 3.500 euro artekoak izan direla negozio bakoitzeko jakinarazi dute eta gehienak dagoeneko ordaindu direla.
Lokalak egokitzeko laguntza
Bestalde, Udalak diru-laguntzen bigarren deialdi bat egingo du merkataritza eta ostalaritza lokalak koronabirusaren aurkako prebentzio eta higiene neurrietara egokitzeko egin beharreko inbertsioak babesteko. Aldundiak 25.600 euro esleitu zizkion Udalari, eta horietatik 6.000 euro baino gehiago banatu dira onartutako hamalau eskaeren artean –aurkeztutako bik ez zituzten baldintzak betetzen–. Gainerako 19.000 euroak ere establezimenduetan egiten diren egokitzapenei laguntzeko erabiliko dira.
