Eguraldi goxoa, musika kalean eta merkatarien eta artisauen postuak Durana eta Mitarte kaleetan. Berezia izan da goiza Aretxabaletan nahiz eta ostalaritzak itxita jarraitzen duen. Arropak, artisautza lanak, jakiak, askotariko tresnak, bitxiak... askotariko eskaintza dago eskuragarri kalean zabaldu dituzten 25 bat postuetan.
Goiza lasai joan dela adierazi dute merkatariek. "Egon dira jende gehiagoko tarteak, baina zaindu dugu pilaketarik ez egotea eta ondo ari garela uste dugu", azaldu du Belar Meta jantzi-dendak Idoia Elexpuruk.
Egun bakarrekoa da aurten Neguko Azoka, eta Herriko Plazan beharrean Durana eta Mitarte kaleetan daude postuak. Goizean 11:00etatik 15:00etara izan da azoka zabalik eta arratsaldeko ordutegia da 17:00etatik 20:00etara.
Segurtasun neurriekin
Aretxabaletako artisauen eta ekoizleen produktuen eta merkataritzaren erakusleiho izan gura du beste behin Neguko Azokak. COVID-19a dela eta ezarritako segurtasun neurriak betetze aldera distantzia dago postuen artean eta zirkuitu bat dago ikusleen joan-etorriak ondo bideratzeko.