Ekarpen horietako batzuek irisgarritasunari erreparatu diote. Horrela, gertuko atarietarako sarbidea libre uztea, oinezkoen pasabidea ez oztopatzea, eta terrazaren eta ondoko eraikinaren artean gutxienez 1,8 metroko distantzia mantentzea eskatu dute.
Herritarrek egindako beste eskaeretako batzuk honako hauek dira: bide publikoaren erabilera mugatzea mahaiak eta aulkiak okupatzeagatik, terrazak har dezakeen azalera lurrean markatzea, ixteko ordutegiak errespetatzea, eta zaratarik eta eragozpenik ez sortzeko mahaiak, aulkiak edo eguzkitakoak arrastaka ez eramatea.
Beste ekarpen batzuk terraza mugikorrak eta finkoak jartzeko baimena ematearekin lotuta daude. "Ostalaritza sektoreak erraztasunak eskatzen ditu terrazak jartzeko", diote Udaletik eta horren adibide honako eskaera hauek: aparkalekuak kentzea terrazak egokitzeko beharrezkoa balitz, oihalezko itxitura mugikorrak jartzen uztea, edo arkupeetan mahaiak ipintzea.
2021erako laguntza lerroa
Proposamen guztiak aztertzen dabil Udala eta urtarrilean egingo den osoko bilkuran hasierako onarpena ematea da asmoa.
Bestalde, Udaletik jakinarazi dute 2021erako laguntza lerro bat sortzea aztertzen dabiltzala, terrazetan egindako inbertsioei laguntzeko.