"Betiko errezetekin ezin zaio egoera berri honi aurre egin: gauzak egiteko moduak aldatu behar ditugu. Eta horren guztiaren erdian, aretxabaletar denen parte hartzeak esanahi berezia du; denok batera hobeto egingo baitugu aurrera", adierazi dute EH Bildutik.
2021eko Udal aurrekontuaren negoziazio prozesuan aurrera eramateko zabaldu dutela prozesu hau adierazi dute: "Horrela, aurrekontuak herritarren beharretatik gertuago egotea lortzea espero dugu". Horregatik, ekarpenak egitera animatu dituzte herritarrak: "Guk, gure aldetik, aukeratuak ez izan arren, modu batean edo bestean, proposamenak Udaleko dinamikan txertatzen joango garela ziurtatzen dugu".
Ekarpenak azaroaren 11 arte
Ideiak, proposamenak eta proiektuak aurkezteko epea zabalik izango da urriaren 28tik azaroaren 11ra bitartean. Horiek bi baldintza bete beharko dituztela jakinarazi dute: interes orokorrekoak izatea eta udal eskumenekoak. Hona hemen ekarpenak egiteko bideak: 688 82 65 81, ehbildu@aretxabaleta.eus eta Herriko Plazako 7, lokaleko buzoian.
Jasotako ekarpenak baloratzeko erabiliko dituzten irizpideak izango dira: bideragarritasun teknikoa, kostua eta eragin ekonomikoa, eta ahalik eta herritar gehienei eragitea. Balorazioaren eta aukeratutako proiektuaren berri azaroaren 25ean emango dute.
