2021eko ordenantza fiskalak onartu zituen atzo, urriak 22, udalbatzak eta zerga eta tasa gehienak izoztu egingo dituzte, besteak beste, ondasun higiezinen gainekoa, autoen gainekoa, urarena eta Ibarra kiroldegiko tasak. Zaborra bakarrik igoko dute, %5 hain zuzen ere.
Etxeetan eguzki plakak
EH Bildu pozik agertu da eguzki plakak jartzeko laguntzak adostu dituztelako Udal gobernuarekin. "Ondasun higiezinen zergaren bitartez 1.000 euro emango zaio familia bakoitzari etxe bakarraren kasuan; eta 3.000 euro arteko laguntza izango da hainbat bizilagunen artean jarriz gero edo lan-jarduera baten kasuan. Beti ere, egindako inbertsioaren erdia baino gutxiago bada laguntza hori", adierazi du Ion Albizu bozeramaileak.
Zaborraren tasa egokitzea
Udal gobernuak proposatutako zergak eta tasak izoztearekin bat etorri da EH Bildu: "Egoera honetan hori tokatzen da eta".
Bestetik, konfinamenduan itxita egondako merkataritza eta ostalaritza zerbitzuei terrazen gaineko tasarik ez kobratzea onartu zuten atzo, eta hobariak aplikatzea uraren eta zaborraren tasetan. EH Bilduk begi onez ikusi ditu, baina harantzago joan da: "Azken bost urteotan eskatzen gabiltza modu estrukturalean gainbegiratzea tasa horiek, bereziki zaborrarena, jarduera eta merkataritza zerbitzu batzuk asko ordaintzen dabiltzalako. Hori betiko egokitu beharko litzateke, eta ez bakarrik aurtengo kasuan".
"Beharra dutenei" laguntzak
COVID-19ak baldintzatutako urtea izanik, beste proposamen bat ere badabiltza lantzen: "Laguntza beharra dutenei zuzenean ematea egokiagoa deritzogu. Adibidez, herrian hainbat jarduera –tabernak, harategia…– izan dira itxita azken hilabeteotan, berrogeialdian egon direlako. Eta baliteke etorkizun hurbilean berriro itxi beharrean izatea, ostalaritza zerbitzuak, esaterako, Nafarroan gertatutako lez. Horiei diru-laguntza zuzenak zelan eman aztertzen gabiltza, itxita egondako egun bakoitzeko, adibidez", azaldu du Albizuk.
Unai Elkoro alkateak erantzun du kontu hori lantzeko asmoa badutela: "Badugu poltsa bat horretarako, 43.000 euro, eta laguntzak zelan eman aztertzen dihardugu".
