Tariman lehiatzeko aukera izan zuten denboraldi honetan lehen aldiz herriko karateka gazteek urriaren 10ean, Hondarribian jokatutako Gipuzkoako txapelketaren baitan.
UDAko karate taldeak kadete, junior eta 21 urtez azpikoetan aritu ziren; azken kategoria horretan lortu zituzten emaitzarik borobilenak: Joanna Perezek urrea eskuratu zuen kumite modalitatean eta zilarra, berriz, katan. Garikoitz Martinek ez zuen kadetetan podiumera igotzerik izan, baina Euskadiko txapelketarako txartela poltsikoratu zuen, gutxienez. Gauzak horrela, bi borrokalariak joango dira Barakaldora urriaren 31n.
Buruz burukoak maskararekin egiteak karatekei "oztopo ugari" jartzen dizkiela aitortu du Odilo Vazquez entrenatzaileak. Kirolariak "gogotsu" badaude ere, segurtasun neurriek motibazioa kentzen dietela gaineratu du Vazquezek.
Urte amaieran Gipuzkoako senior mailako txapelketa jokatzekoak dira aretxabaletarrak.
