Sanmigeletako azoka bertan behera utzi ondoren, Udaleko Kultura Sailak plaza berria eskaini gura izan die herriko artisauei. Eta horiek eskertuta agertu dira: "Nik ez daukat kanpoko azoketara joateko ohiturarik, hortaz, eskertzen dut beste aukera bat eman izana herrian bertan", adierazi du eztiak ekoizten dituen Ariane Unanuek. Eztiaz gain, zilarrezko bitxiak, oihalezko apaingarriak, maskarak, pintura-lanak, panpinak eta baserritar arropak ere eskaini dituzte besteak beste, elkartu diren bederatzi artisauek.
Eguraldi kaskarrak aterruneak ere eskaini ditu, eta Durana kalea bete egin da une batzuetan, artisauen postuak inguratuz: "Sanmigeletako azoka faltan bota nuen eta gustura hartu dut hau azoka gosea asetzeko", zioen herritar batek. Begira eta kuxkuxean bakarrik ez, erostera ere asko gerturatu dira: "Herriko komertzio txikiari lagundu egin behar diogu, baita artisauei ere".
