Lan handia egin zuten Aretxabaleta kirol elkarteko kideek segurtasun eta osasun neurriak "zorrotz" betetzeko. Atean, izen-abizenak eta telefono zenbakia eskatu zizkieten guztiei, baita tenperatura hartu ere. Eta harmailetan ondo zehaztutako jarlekuetara bideratu zituzten ikusleak.
Ohorezko Erregionaleko taldea gertutik ikusi gura izan zuten askok; izan ere, harrobiko jokalariekin indartu dute. Gainera, Realeko Ohorezko Gazteen artean bi aretxabaletar daude: Beñat Elkorobarrutia jokalaria eta Gorka Valle entrenatzaile taldean. Horien lana gertutik ezagutzeko gogoa ere bazegoen.
Ez zen aparteko partidua izan eta lehen zatian apenas egon zen gol aukerarik, bakarren bat batak zein besteak. Bigarrenean iritsi ziren etxekoen bi golak; lehenengoa, Jon Ander gasteiztarrak egin zuen, eta bigarrena, Unai Cebrinok, Ohorezko Gazteen taldetik igo berri duten aretxabaletar gazteak. Hala, 2 eta 0 irabazita Realekoei pozik etxeratu ziren zaleak.
