Morian zeudenak orain sakabanatuta, eta asko galduta, dabiltzala diote adierazpenean: "Elkarte eta erakundeak egoeraren mapeoa egiten ari dira, errefuxiatuak non pilatu diren aztertzeko eta janaria nola banatu eta haiengana nola heldu baloratzeko". Lan hori egiten dabiltzanen artean dago, hain zuzen, Zaporeak euskal elkartea.
Hori horrela, Aretxabaletako Udalak onartu du errefuxiatuak hartzeko prestutasuna erakustea, eta haiekin lanean diharduten erakundeekin lan egiteko konpromisoa hartzea. Era berean, iheslariak integratzeko harrera planari eusteko konpromisoa berretsi du, Foru Aldundiarekin eta Eusko Jaurlaritzarekin batera.
Immigrazio eta asilo arloan politika bateratuak egiteko eskaera ere egingo die Espainiako Gobernuari eta Europako erakundeei, "pertsonei lehentasuna emanez eta giza eskubideen zaintza bermatuz". Eta Moriako gertaeraren aurrean jarrera aktiboa eta solidarioa hartzea ere eskatu gura die Foru Aldundiari eta Eusko Jaurlaritzari, "tragediaren ondorioak arintzeko eskura dituzten bitartekoak bideratuz".
