Aurrez aurreko eskoletara itzuliko dira Leizarra musika eskolan ere, horretarako beharrezko den protokoloa zehaztuta. Geletara ikasleek bakarrik igo beharko dute –5 eta 6 urtekoak laguntzaile bakarrarekin– eta igogailurik ez erabiltzeko eskatu dute –beharrezkoa bada, banaka erabili behar da–. Maskarekin egon beharko dute eta eskuak garbitu beharko dituzte.
Moldaketa batzuk ere egin behar izan ditu eskolak. Izan ere, gelaren tamainaren arabera 10 edo 12 ikasle elkartuko dira, ez gehiago. "Abesbatzako taldean 21 ikasle inguru daude, hortaz, bi talde osatzea erabaki dugu", dio Mariatxen Urkia zuzendariak. Ikasleen arteko kontaktua ekiditen saiatuko dira, baina badakite dantza eskoletan eta tailerretan zaila izango dela hori: "Tailerren kasuan, ume bakoitzak bere material-kaxa izango du. Eta garbitasuna asko zainduko dugu". Instrumentuen kasuan eskola batetik bestera arteko tarteetan garbitasun lanak egingo dituzte, horregatik 5 minutuko tarteak hartuko ditu irakasleak horretarako.
