Ibarra kiroldegiak irailerako ordutegi berria diseinatu du, eta, horrekin batera, kirol jardueren eskaintza ere martxan jarriko da irailaren 14tik aurrera. Gainera, kirol jardueraren bat hasi aurretik probatu nahi duenak aukera izango du horretarako, irailaren 14tik 17ra bitartean, aurrez hitzordua hartuta.
Neurriak hartuta
Segurtasun neurri guztiak hartuta eta protokoloa ezarrita, Ibarra kiroldegiko instalazioetara maskararekin joatea derrigorrezkoa izango da, eta baita erabiltzaileen arteko segurtasun distantziak mantentzea. Aldagelak erabilgarri egongo diren arren, Osasun Sailak ezarritako edukiera mugak bete eta bertan ilara luzeak ez izateko, gimnasiora zein jardueretara doazenek etxetik aldatuta joan eta etxean dutxatzeko gomendioa egin dute.
Iraileko ordutegia
Irailaren 14ra arte, 08:00etatik 14:00etara eta 16:00etatik 21:00etara bitartean egongo dira zabalik instalazioak. Zapatuetan, 10:00etatik 14:00etara eta 16:00etatik 20:00etara, eta irailaren 6an eta 13an –domekak– eta irailaren 26a itxita egongo da. Irailaren 14tik aurrera, berriz, 07:00etatik 21:30etara bitartean egongo da zabalik kiroldegia astegunetan, eta irailaren 20an eta 27an –domekak–, berriz, 09:00etatik 14:00etara bitartean egongo da zabalik.
Eskaintza zabala
"Herritarrak kirola egitera animatu nahi ditugu. Hala, jardueraren batean izena eman aurretik probatu nahi duenak aukera izango du horretarako", adierazi du Asier Mujikak, Kirol teknikariak. Honako hauek dira, bestalde, prestatu dituzten zenbait ikastaro: igeriketa, areto bizikleta, multifitnessa, sasoian egoteko gimnasia, GAP, yoga, KOI, gimnasia abdominal hipopresiboa, tonifikazioa, xunba, pilatesa, core training-a…
Jardueretako edukierak murriztu egin dituzte, eta, saio artean garbiketa eta desinfekzio neurriak betetzeko, saio batzuen iraupen denbora laburtu egin dute. Taldea osatzeko gutxieneko kopurua, berriz, zortzi pertsonakoa izango da aretoko jardueretan eta sei pertsonakoa uretakoetan.
Izen-ematea zabalik
Hala, kirol jardueretan izena emateko epea zabalik, nahi duenak info@ibarrakiroldegia. eus helbidera idatzi edo 943 03 98 42 telefono zenbakira deitu beharko du.
