Maiatz bukaeran aurkeztu zuen Izan bidea ekimena Sarek horren helburua izanik "preso eta iheslarien auzia behin betiko konpontzeko urratsak ematea, jendartea aktibatzea eta Euskal Herriaren aniztasuna batzea".
Dinamika horren ardatza erronka bat da: 3.127.326 km egitea, hau da, Euskal Herriak dituen biztanle adina kilometro. Eta horretarako ibiltariak gura dituzte: "Gure herriko biztanle bakoitza ibiltari izatea nahi dugu. Izan norbanako moduan, familian, lagunekin edo era kolektiboan", adierazi zuten eguaztenean egindako agerraldian eta gaineratu: "Gure herrian ere Gari Aretxabaletara ekarriko duen Ibiltarien sarea osatzera deia egiten dugu".
Egindako kilometroak pilatzeko mugikorreko aplikazio bat jarri dute martxan –oraingoz androiderako bakarrik–; eskuratzeko bidea hemen: www.labur.eus/appizanbidea. Eta argazkiak ateratzera ere gonbidatu dituzte herritarrak: "Patinetan, takarraran, oinez, piraguan, eskalada egiten… Aldarriak soinean hartu, atera argazkia, grabatu bideoa eta igo sare sozialetara edo bidali guri". Hona hemen helbidea: atxabaltakosare@gmail.com. Eta gaineratu dute: "Etxeratzeko bidea egiteko garaia da; izan gaitezen bide honen parte eta ekar dezagun Gari Aretxabaletara!".