2019-2020 denboraldia
UDAko presidente Agurtzane Elkororekin batera, batzarra gidatzen aritu ziren Adrian Merino, Julen Eceiza eta Nerea Olmedo eta lehenik, 2019-2020 denboraldiaren xehetasunak eman zituzten. Elkorok aipatu bezala, amaitu berri den denboraldiari dagokionez, hiru puntu positibo zehaztu zituzten: "Lehengoa da, denboraldia beharrezkoa genuen futbol zelai berri batekin hasi genuela; bigarrena, UDAk kudeatzaile berri bat duela -Ainara Muga-elkartean diharduten kirolarien kudeaketa eramateko eta azkenik, kirol arloan UDAk izugarrizko denboraldia egin duela".
Guztira, 612 kirolari aritu dira UDAk dituen sail ezberdinetan: 156 futbol eskolan, 177 oinarrizko futbolean, 66 senior futbolean, 14 areto futbolean, 24 beteranotan, 56 Leintz Arizmendin, 28 karaten, 26 gimnasia erritmikoan eta 65 pilotan.
Datorren denboraldia
2020-2021 denboraldia ere izan zen hizpide batzar orokorrean. Izan ere, Elkororen esanetan, UDAk bi agertoki aukera ditu datorren denboraldira begira: "Lehen agertokia litzateke, partiduak urrian hastea, nahiz eta arlo batzuetan egoera oso zaila ikusten dugun. Karaten esate baterako, txapelketak leku itxietan izaten dira, baina kirolarien arteko kontaktua ezinbestekoa da. Bigarren agertokia berriz, 2021eko urtarrilean hastea litzateke eta kasu honetan egongo bagina, atzerapausoa litzateke gure helburua kirola egiten jarraitzea delako".
Horrekin batera, Elkorok aipatu du arlo batzuetan Federazioak hartutako erabakiaren zain egon beharko direla, besteak beste, pilotan eta futbolean.