Ohitura horiei jarraipena ematen zenbait aretxabaletar daude. Lizar adarrekin egiten dituzte gurutzeak eta hainbat lore eta belarrekin apaindu: "Garia jartzen da irin asko izateko etxean, eta oloa, ganaduak jatekoa izan dezan. Horrekin batera irak, sanjuan loreak eta beste hainbat motatako belarrak sartzen ditut. Aurten, gainera, sasoia baino lehen loratu dira asko, eta orain ez dago asko...". Inguruan jasotzen ditu horiek, Areantza aldean, esaterako.
Aurten 25 gurutzetik gora egin dituzte eta bi lagun ibiliko dira horiek jartzen; goizaldean jardungo dute horretan: "Atarte batzuetan neuk jarriko ditut eta beste batzuetan eskura emango diet ugazabei, hainbat dendatan esaterako". Ohitura zaharra izan arren gaur egun ere oso pozik jasotzen dituztela gurutzeak dio: "Eta gehiagok ere gustura jasoko lituzketela esango nuke. Ez dakit fedea duten edo ez, baina eskatu egiten digute tradizioaren izenean. Baina bere lana eta arduratxoa dute gurutze hauek, ez pentsa!".
Irak atarteetan
Bikote horrek irak ere bota ditu, urte askoan, atarte guztietan. "Erretiratu berritan hasi ginen, eta orduan inguruko basoetara joan eta igitaiarekin mozten genituen. Orduan bai lana!". Eta baserritarrekin eztabaidak ere izan ohi zituzten: "Haserreak jasotakoak gara, haserre handiak, eta behin baino gehiagotan, gainera".
Aurten, osasun larrialdia dela-eta, ez egitea erabaki du. Dena den, beste taldetxo batek jardungo du horretan: "Pozten naiz; aurrera egin dezatela horiek! Datorren urtean jarraitzeko gertu gaude, baina zenbat eta gehiago izan hobeto".