Santa Kurtz kalearen eraberritze lanetan gauzak ondo eta presarik gabe egin behar direla uste du EH Bilduk. Eta hainbat puntu argitu gura izan ditu. Batetik, ekarpenak egiteko aukerarik izan ez izana proiektua lantzerakoan: "Proiektuak herritarrei ireki edo gauzatu aurretik, ekarpenak egiteko eta Udalean lan egiteko tartea izaten dute, logikoa denez". Eta bestetik dio bi proposamenak oso berdintsuak eta gutxi landuak direla: "Prozesua azkar egin nahi izatea sumatzen dugu".
Proiektuari ez diotela behar besteko arreta eskaini gaineratu dute, eta bereziki, aparkalekuen kontua aipatu du: "Hobeto aztertu behar da inguruan zenbat auto dauden erroldatuta, ordu-tarteak, bisitariak… Eta horretan oinarrituta, auzotarrentzat jasangarria den planteamendu integral bat aurkeztu".
Hauteskunde garaia
EH Bilduk argitu gura izan du Eusko Legebiltzarrerako hauteskundeak deitu zirenetik ezin direla proiektuak inauguratzeko ekitaldirik egin, ezta Santa Kurtz kaleko prozesua ere: "Bergarako Hauteskunde Batzordeari egin zitzaion kontsulta, eta hark esan du ezin dela udalak planteatzen duena egin".
