Atiempo enpresa arduratuko da horrekin, eta debalde izango da. Zerbitzuak hiru fase ditu. Lehenengoan, teknikariek ikuskapen bat egingo dute etxebizitzek dituzten arriskuak antzemateko; horretarako, gasaren, galdaren, berogailuaren edo instalazio elektrikoen berrikuspenak egiaztatuko dituzte. Prebentzioaren eta suteen aurrean zelan jokatu ezagutzak ere emango dizkiete adinekoei.
Bigarren fasean suteak antzemateko sistema egokituko dute; kea dagoela ohartarazteko, soinu-alarma bat edo argi-alarma bat jarriko diete. Eta hirugarrenean, etxebizitzaren eta eraikinerako irisgarritasunaren krokis bat egingo da, suhiltzaileei lana errazteko; erreakzio-denborak murriztea eta ebakuazio azkarra egin ahal izatea da horren helburua.
Ia 500 lagun 80 urtetik gorakoak
Aretxabaletan 492 herritarrek dituzte 80 urte baino gehiago. Lehen kanpaina honetarako, diru-partida bat bideratu du Udalak (iazko maiatzean onartu zuen udalbatzak hori), eta dozena bat etxebizitzetan jarriko dituzte su detektagailuak. Programak jarraipena izango du, eta itxaron zerrendan geratzen diren eskaerei hurrengo kanpainetan erantzungo dietela adierazi dute Udal ordezkariek.
