Kalitatezko eta eskaintza kultural finko baten aldeko apustua egin gura izan du Loramendi Elkarteak. Hori horrela, auzolanean, udaletxe zaharreko sarrera egokitu dute, paletak erabiliz sofa eta aulkiak eginez, eremu eroso eta goxoa sortzeko. Gaur estreinatuko dute gune hori; hain zuzen, Eneritz Furyak –izen artistikoa da hau– abeslari iruindarrak eskainiko du kontzertua bertan.
Hitz poetikoez baliatzen da abeslari eta konpositore dena. Berak dioenez, bere musika heterodoxoegia da folk konbentzionaleko ikuspegi hertsiarentzat. Popetik ez da urrunegi, baina punka da osagai ezinbestekoa bere kantuetan.
15 urte zituela eman zuen bere lehen kontzertua talde batekin, eta egun, 26 ditu. 2017an atera zuen Eneritz Furyak izeneko diskoa, eta 2018an etorri zen Zaldi Zuria/Maskara.
Gaztea Maketa Lehiaketako Kafe Antzokiaren saria irabazi zuen 2017an. Katalunian, Galizian, Frantzian, Belgikan, Italian... izan da kontzertuak ematen.