Santa Kurtz kaleko bidegorriaren lanak zeinek egingo dituen erabaki du Udalak; Probisa Vias y Obras enpresa bizkaitarrari esleitu dizkio. 213.700 euroko kostua izango dute, eta ekainean hasiko dituzte Xabi Otxoa Hirigintza zinegotziak azaldu duenez: "Eskola jardueran eragin ditzaketen eragozpenak gutxitzeko helburuarekin egingo ditugu udako oporraldian". Hamaika astetan bukatuta izatea lanok gurako lukete, abuztu bukaerarako hain zuzen ere, eta hala, irailerako erabilgarri egongo litzateke.
Garajeetatik saihesbidera
Aretxabaleta barrutik pasatzen den bidegorriaren tarte horrek 278 metro inguru ditu; trenbide zaharreko plataformatik –Kurtzebarri eskolaren iparraldea– Basabe industrialde ingururaino doa –Eroski aurrealdea–. Gune horretan bizikletendako zehaztuta dagoen erreiarekin bat egingo du.
Lan horiek aprobetxatu gura ditu Udalak Kurtzebarri eskolaren aurrealdean oinezkoen eta txirrindularien segurtasuna hobetzeko. Eta horretarako, gaur egungo zirkulazio-erreiak estutu egingo dituzte, eta sigi-sagan jarri, ibilgailuen abiadura murrizteko.
Ez da izango aldaketa bakarra. Lan horien ostean, Santa Kurtzetik sarbidea duten etxebizitzen garajeetatik datorren zirkulazioa –21 eta 27 zenbakien artekoak– kendu egingo da kaletik, saihesbiderantz zuzenean irteteko modua eskainiko dietelako autoei: "Neurri horrek are gehiago murriztuko du une honetan eskolaren aurretik derrigorrean pasatu behar duten ibilgailu kopuruaren zati bat", adierazi du Udal ordezkariak.
Kurtzebarriko jolastokitik atera
Bidegorriaren zati bat gaur egun Kurtzebarri eskolako jolastoki erditik pasatzen da. Eta lanen beste helburuetako bat da oinezkoen eta bizikleten erreiaren trazatua hortik ateratzea.
Lanok bukatutakoan Arrasatetik Eskoriatzaraino herri barrutik doan bidegorriaren ibilbidea osatuta geratuko dela adierazi du Otxoak: "Obra horiekin Udalak beste pauso bat emango du mugikortasun jasangarriaren alde, beste jarduera batzuen ildotik jarraituz".
