Agintaldi honetan Hiri Antolamendurako Plan Orokorra garatzea da Udalaren asmoa. Plan horrek zehaztuko du hain zuzen herriko hainbat gunek etorkizunean izango duten erabilera –bizitegi-erabilerak, ekipamenduak, zerbitzuak…–, baita non eraiki ahal izango den eta non ez eta jarduera ekonomikoak zeintzuk izango diren ere. Hori horrela, Aretxabaletaren garapena eta hirigintza antolamendua zein izango den zehaztuta geratuko da.
Lan horretan murgiltzeko arkitekto bat kontratatuko du Udalak. Haren egitekoak izango dira besteak beste, plana (HAPO) idaztea eta hori behin betiko onartzeko beharrezko diren jarduera administratiboen jarraipena egitea.
Eskaerak udaletxean aurkeztu behar dira; azken eguna otsailaren 2a da (15:00ak baino lehen). Ezinbestekoa izango da arkitektura gradua edo lizentziatura edukitzea eta kontuan hartuko dituzte euskararen ezagutza, esperientzia eta formakuntza.